အဆင့်မြင့်ပညာရေး အားမရ

ရန်ကုန်၊ မန္တလေး၊စစ်တွေ၊ တောင်ကြီး၊ မြိတ် စသော တက္ကသိုလ်များတွင် တက္ကသိုလ်ပညာရေးကို ပြန်လည် အဆင့်မြှင့်ရန် ဆရာဆရာမများ၏ ကြိုးစားမှုမှာ ရာနှုန်းပြည့် မအောင်မြင်သေးကြောင်း သိရသည်။

“ကျောင်းတွေ မြို့ပြင်ထုတ်ချင်ရင် ကျောင်းသားတွေ ကျောင်းအိပ်ကျောင်းစား တက်လို့ရအောင် အဆောင်တွေ လုပ်ပေးရမယ်။ မြန်မာပြည် အနေအထားအရ ဒီအဆောင်တွေမှာ ကျောင်းသားမိဘတွေ ကလေးတွေကို ဈေးသက်သက်သာသာနဲ့ ထားနိုင်အောင် လုပ်ပေးရမယ်။ နေ့ကျောင်းတက်တဲ့ ကလေးတွေ များရင် သွားလာရေးအဆင်ပြေအောင် လုပ်ပေးရမယ်။ ဒီအခြေခံတွေ ဘာမှ မရှိဘဲ တက္ကသိုလ်တွေ ဖွင့်တာလဲ အပြစ်တော့ မတင်မိဘူး။ မဖွင့်တာနဲ့စာရင် တော်သေးတာပေါ့။ မတော်တာက ခုထိ ဘာမှ ပြင်မပေးဘဲ ဒီတိုင်း လွှတ်ထားတာ” ဟု ရန်ကုန်တက္ကသိုလ်ကျောင်းသားဟောင်း ကွန်ပျူတာပညာရှင် တဦးက ပြောကြားသည်။

ကျောင်းသား ၄၀၊ ၅၀ ရှိသော အတန်းများတွင် အထူးပြုနှင့် သာမန် ဘာသာရပ်များ သင်ကြားချိန်များတွင် ကျောင်းသားအများစု ကင်တင်းနှင့် အခြား စုရပ်များ ရောက်ရှိနေပြီး အတန်းထဲတွင် လူနည်းနေတတ်သည်။ ပရက်တီကယ်ခေါ် လက်တွေ့ခန်း ၀င်ရချိန်များတွင်လည်း မလာရောက်ကြဘဲ သူငယ်ချင်းများကို လူစားထိုး လက်မှတ်ထိုးခိုင်းကြသည်။ “လက်တွေ့ခန်း ၀င်ခိုင်းတယ်ဆိုတာ တကယ်တတ်စေချင်လို့ပါ။ ဒါလေးတောင် တလေးတစား မလာရင် သူတို့ယူမယ့်ဘွဲ့ကို ဘယ်လိုလုပ် တကယ်တတ်မှာလဲ”ဟု အဆိုပါ ကွန်ပျူတာပညာရှင်က ဆက်လက် ပြောကြားသည်။

နည်းပညာကောလိပ်များတွင် ကျောင်းသားများ စာသင်ချိန်အတွင်း ကျောင်းခန်းများထဲတွင် ရှိနေစေရန် စည်းကမ်းများ ထုတ်ပြန်သော ကျောင်းအုပ်ကြီးများမှာလည်း ကျောင်းသားများ၏ မကျေနပ်မှုကို ခံယူရသည်။ တတ်မြောက်ကျွမ်းကျင်မှု မရှိဘဲ စာမေးပွဲ အအောင်ပေးလျှင် အရည်အချင်းမမီသည့် အင်ဂျင်နီယာများ ဖောင်းပွလာမည့် ပြဿနာကို မြန်မာ ဗိသုကာနှင့် အင်ဂျင်နီယာ လောကတွင် ကြုံတွေ့ရမည်ဖြစ်ကြောင်း သိရသည်။

၁၉၉၆ ကျောင်းသားအရေးအခင်းနောက်ပိုင်း တက္ကသိုလ်များကို မြို့ပြင်ရွှေ့ခြင်း၊ ကျောင်းသားများ အဝေးသင် ပြောင်းအောင် လုပ်ခြင်း၊ သင်ရိုးမပြီးမီ စာမေးပွဲစစ်ပြီး အအောင်ပေးခိုင်းခြင်းများ ဖြစ်ပြီးနောက် အဆင့်မြင့်ပညာရေးနယ်ပယ်မှာ မတည်ငြိမ်မှုများ တိုးမြင့်လာခဲ့ သည်။